Duke nisur nga 1 janari 2026, qeveria parashikon rritjen e pagës minimale dhe maksimale, një masë që pritet të sjellë efekt pozitiv në buxhetin e sigurimeve shoqërore dhe shëndetësore.
Sipas projektbuxhetit për vitin e ardhshëm, paga minimale do të rritet nga 40 mijë lekë në 50 mijë lekë, ndërsa paga maksimale do të shkojë nga 176,416 lekë në 186,416 lekë.
Për të zbutur ndikimin tek bizneset, qeveria do të mbulojë për 9 muaj kostot e sigurimeve shoqërore dhe shëndetësore për sektorin privat.
Eksperti i ekonomisë Selami Xhepa vlerëson se kjo lëvizje do të sjellë rreth 130 milionë euro më shumë në buxhetin e sigurimeve:
“Rritja e pagave do të gjenerojë më shumë të ardhura në fondet e sigurimeve shoqërore dhe shëndetësore. Kjo do të nxisë edhe sektorin privat të rrisë pagat, duke kontribuar më tej në këtë buxhet,” – shprehet Xhepa.
Një tjetër risi është indeksimi i pagave në administratë me 2.5%, që do të përfshijë punonjësit e institucioneve qendrore dhe vendore.
“Është hera e parë që vendoset një indeksim i tillë, por duhet të bëhet praktikë e përvitshme, si për sektorin publik ashtu edhe për atë privat,” – shton Xhepa.
Sipas të dhënave të administratës tatimore, efekti pozitiv në të ardhura pritet të arrijë në rreth 9 miliardë lekë, nga të cilat 7.6 miliardë lekë do të vijnë nga kontributet e sigurimeve shoqërore dhe 1.4 miliardë lekë nga sigurimet shëndetësore.