Ministrja e Ekonomisë dhe Inovacionit, Delina Ibrahimaj, theksoi se buxheti i vitit 2026 është i fokusuar në përmirësimin e mirëqenies së qytetarëve, duke vënë në qendër mbështetjen për pensionistët, rritjen e pagave dhe krijimin e mundësive për punësimin e të rinjve.
Në një takim me banorë të Njësisë 6 dhe Lagjes 14 në Tiranë, Ibrahimaj u shpreh se buxheti e bën realitet premtimin për rritjen e pensioneve dhe mbështetjen për familjet shqiptare. Nga 1 janari 2026, pensioni mesatar në zonat urbane do të arrijë në 400 euro, ndërsa bonusi i fundvitit për pensionistët do të vazhdojë të rritet çdo vit.
Një tjetër nismë e rëndësishme është rritja e pagës minimale, që do të arrijë në 500 euro, duke përfituar rreth 300 mijë qytetarë. Për punonjësit e administratës publike, janë parashikuar rritje pagash mesatarisht 3-5 mijë lekë në muaj, ndërsa sektorët prioritarë si shëndetësia dhe policia do të përfitojnë përveç indeksimit edhe nga rregullimi i skemës së vjetërsisë.
Për të rinjtë, qeveria ka parashikuar një fond prej 12 milionë euro për programet e punësimit. Njëkohësisht, mbështetja për sektorin e shëndetësisë do të rritet me 1,5 miliardë lekë, me fokus te onkologjia, dhe nga viti 2026 pritet implementimi i mbulimit universal për shërbimet onkologjike.
Ministrja Ibrahimaj e konsideron këtë buxhet një hap të rëndësishëm për të garantuar një të ardhme më të mirë për qytetarët e Shqipërisë.