Plani i qeverisë britanike transferimin e azilkërkuesve të dëbuar në “qendra kthimi” jashtë vendit mesa duket ka gjetur mbështetje dhe nga Agjencia e Kombeve të Bashkuara për Refugjatët (UNHCR).
Burime të sigurta brenda qeverisë e përshkruan këtë nismë si një “ndryshim loje”, pas një takimi mes Sekretares së Brendshme britanike Yvette Cooper dhe kreut të UNHCR-së, ku u diskutua mundësia e pagesës ndaj disa vendeve të Ballkanit për të pranuar azilkërkues të refuzuar nga Mbretëria e Bashkuar.
Nga ana tjetër gazeta britanike The Times shkruan se qeveria britanike po shqyrton hapjen e disa qendrave jashtë vendit për azilkërkuesit që nuk fitojnë të drejtën e qëndrimit në Britani.
Vendet e propozuara deri më tani janë Shqipëria, Serbia, Bosnja dhe Maqedonia e Veriut.
Një dokument i UNHCR-së e përshkruan këtë si “nevojën për sisteme efektive të kthimit dhe rolin potencial të qendrave të kthimit”, ka sinjalizuar gatishmërinë e agjencisë për të mbështetur këto përpjekje, përfshirë edhe Mbretërinë e Bashkuar.
Britania mësohet se po kërkon të ndjekë shembullin e Italisë, e cila tashmë ka dy qendra në Shqipëri për përpunimin e azilkërkuesve të kapur në Detin Mesdhe.
UNHCR ka theksuar se në rastin e Mbretërisë së Bashkuar, thelbësore mbeten mekanizmat e monitorimit në këto qendra për të garantuar respektimin e standardeve të të drejtave të njeriut.
Një burim pranë qeverisë britanike u shpreh: “Kjo mund të ndryshojë rrënjësisht situatën, pasi do të na sigurojë mbështetje ligjore kundër çdo sfide gjyqësore dhe gjithashtu do të ndihmojë politikisht përballë deputetëve tanë të majtë që kanë rezerva për këtë çështje.”
Një tjetër burim shtoi: “Po punojmë në disa zgjidhje për të luftuar emigracionin e paligjshëm, përfshirë bashkëpunimin me vende të BE-së dhe më gjerë për të çmontuar rrjetet kriminale që përfitojnë nga kalimet me gomone.”
Plani vjen në një kohë kur numri i emigrantëve që kalojnë Kanalin e La Manshit ka arritur nivele rekord, duke rritur presionin mbi qeverinë për përpunimin e kërkesave për azil. Vetëm të premten, 51 refugjatë u morën nga një anije e Forcës Kufitare dhe u zbarkuan në portin e Doverit, pas një emergjence mjekësore që përfundoi me vdekjen e një migranti.
Sekretari i brendshëm në hije, Chris Philp, kritikoi qeverinë aktuale duke deklaruar: “Ky është një tregues se gjithnjë e më shumë vende po shqyrtojnë idenë e deportimit të emigrantëve të paligjshëm jashtë Evropës. Mbretëria e Bashkuar mund të ishte udhëheqëse me skemën e deportimit drejt Ruandës, por ajo u anulua nga Partia Laburiste përpara se të vihej në zbatim. Tani, në vitin 2025, kemi rekorde të reja të kalimeve të paligjshme.”