Një ngjarje e pazakontë ka ndodhur me kompaninë ajrore shqiptare “Air Albania” e cila u raportua se braktisi klientët në aeroportin e Milanos, pa dijeninë e tyre.
Për ngjarjen në fjalë klientët bënë denoncimin e tyre, ndërsa burimet bëjnë me dije se kompania nuk ka qëndruar në heshtje.
Në një deklaratë për “News 24” kompania tha se fluturimi u anulua për shkaqe teknike ndërsa pasagjerët kanë qenë në dijeni të kësaj ndodhie.
Sakaq, siç ju raportuam pak më parë, pasagjerët kanë bërë ankesat e tyre për padijeninë e rastit në fjalë.
Më tej kompania njofton se shërbimin e anuluar do e japë ditën e sotme.
Deklarata e plotë:
Në përgjigje të publikimit në një media të një situate anullimi e cila ka ndodhur për shkaqe teknike në fushen e aviacionit, gjejmë rastin të sqarojmë publikun se pasagjerët tanë të fluturimit ZB2004 nga Milano në Tiranë në datën 11 Tetor, janë trajtuar në përputhshmeri me të drejtat e pasagjerëve, Rregullorja (EC) 261/2004.
Pas një problemi teknik dhe duke pasur në fokus sigurinë e pasagjerëve ne u detyruam të anullojmë fluturimin. Pasagjerët janë mbajtur të informuar nga stafi i Air Albania dhe gjithashtu do të fluturojnë ditën e sotme nga Milano në Tiranë.
Air Albania garanton në nivel maksimal sigurinë në avionët dhe udhëtimet tona.
Skuadra të dedikuara ekspertësh monitorojnë operacionet 24/7.
Me Air Albania çdo qiell është i sigurtë!