Një ngjarje shokuese ndodhi ditën e djeshme teksa disa pasagjerë e kaluan natën në ambientet e aeroportit të Milanos, pasi kompania ajrore shqiptare, “Air Albania” në pronësi të qeverisë shqiptare dhe aksion biznesmenin Sinan Idrizi, anuloi fluturimin dhe i braktisi ata në mes të “hiçit”.
Nga ora 14.00, pasagjerët mbërrtiën në terminal për të kryer procedurat e embarkimit.
Siç dëshmuan ata për News24, sistemi check-in nuk ishte hapur ndonëse fluturimi ishte parashikuar për në orën 16.50.
Nga punonjësit e aeroportit, u lajmëruan se në pistën e Malpensas nuk ishte ansjë nga avionët e “Air Albania”.
Megjithatë, pasagjerët vijuan procedurat e kontrollit dhe u ngjiten në avion me mendimin që gjithçka po shkonte mirë. Por këtu ishte kulmi i torturës për ta.
Për 2 orë me radhë ata janë lënë në pritje brenda në bordin e avionit, duke nxitur edhe protestën e tyre, ndërsa ekuipazhi doli me njoftimin se nuk kanë leje nga kulla e kontrollit për nisur fluturimin.
Pasagjerët denoncuan sjelljen çnjerëzore ndaj tyre, pasi ata i detyruan të zbrisnin me forcë nga avioni nga policia italiane.
Pasagjerët ankohen se në mesin e tyre ndodheshin foshnja, të moshuar edhe persona të sëmurë.
Kompania ajrore “Air Albania” refuzon t’u përgjigjet.
Përgjatë një videoje të publikuar në rrjet shihet momentin teksa pasagjerët telefonojnë “Air Albania”-n, por punonjësja nga përtej telefonit thotë se nuk ka dijeni se çfarë ka ndodhur dhe se nuk mban as përgjegjësi.
Më pas ajo i mbyll telefonin pasagjerëve ndonëse thirrja e tyre ishte për ndihmë.