Botërori i vitit 2026 po shoqërohet me debate të shumta, jo vetëm për formatin e ri me 48 skuadra dhe zhvillimin e tij në tre shtete – SHBA, Kanada dhe Meksikë – por edhe për çmimet e larta të biletave, të cilat sipas tifozëve janë ndjeshëm më të shtrenjta se në Kupën e Botës në Katar.
Shqipëria ende nuk e ka siguruar pjesëmarrjen në finalet e Botërorit, pasi më 26 mars do të përballet me Poloninë në ndeshjen e parë të “play-off”-it. Megjithatë, sipas shortit të hedhur më 5 dhjetor, Kuqezinjtë janë të pozicionuar si “Play-Off B” në një grup me Holandën, Japoninë dhe Tunizinë.
Nëse Shqipëria do të kualifikohet, kostoja për një tifoz shqiptar që dëshiron të ndjekë të tre ndeshjet e fazës së grupeve do të jetë mjaft e lartë. Sipas çmimeve zyrtare të FIFA-s, për secilën ndeshje janë parashikuar dy kategori biletash.
Për ndeshjen ndaj Tunizisë në Monterrey të Meksikës, bileta e Kategorisë së Parë kushton 450 dollarë, ndërsa ajo e Kategorisë së Dytë 380 dollarë. Sfida kundër Holandës në Houston të SHBA-së ka çmime edhe më të larta: 600 dollarë për Kategorinë e Parë dhe 430 dollarë për Kategorinë e Dytë. Ndërkohë, për ndeshjen me Japoninë në Dallas, bileta e Kategorisë së Parë kushton 500 dollarë, ndërsa ajo e Kategorisë së Dytë 400 dollarë.
Në total, pa përfshirë shpenzimet për udhëtim, akomodim apo parkim, një tifoz shqiptar do të duhet të paguajë rreth 1550 dollarë për biletat e Kategorisë së Parë, ose 1210 dollarë për variantin më të lirë. Këto janë çmime zyrtare të FIFA-s, ndërsa kualifikimi i Shqipërisë mbetet ende peng i ndeshjeve të “play-off”-it.