Bordi i Transparencës ka miratuar çmimet e reja tavan për tregtimin e karburanteve në vend, të cilat kanë hyrë në fuqi këtë të premte, më 6 qershor 2026, në orën 14:30.
Sipas vendimit të fundit, çmimi maksimal i shitjes me pakicë për naftën (gazoilin) është përcaktuar në 190 lekë për litër, ndërsa benzina do të tregtohet me jo më shumë se 173 lekë për litër.
Për tregun me shumicë, çmimi i gazoilit është vendosur në maksimum 178 lekë për litër, ndërsa ai i benzinës në 161 lekë për litër.
Bordi bëri të ditur se këto çmime do të mbeten në fuqi deri në mbledhjen e ardhshme, kur do të rishikohen në bazë të luhatjeve të tregjeve ndërkombëtare dhe metodologjisë së përcaktuar për përllogaritjen e çmimeve.
Autoritetet u kanë bërë thirrje operatorëve të tregut të zbatojnë vendimin, duke paralajmëruar se në rast shkeljesh mund të merren masa deri në pezullimin e aktivitetit.
Në njoftim sqarohet gjithashtu se çmimet aktuale janë nën kufijtë e përcaktuar nga Akti Normativ nr. 1, datë 3 prill 2026, i cili parashikon uljen e akcizës në 80% vetëm në rastet kur çmimi i naftës kalon 220 lekë/litër ose ai i benzinës 200 lekë/litër. Për rrjedhojë, akciza do të vazhdojë të aplikohet në nivelin e plotë, 100%.
Ndërkohë, për sektorin e peshkimit, çmimi i gazoilit është përcaktuar në 95 lekë për litër, në përputhje me përjashtimet fiskale të parashikuara nga legjislacioni në fuqi për anijet e peshkimit.