Qarkullimi në aksin Qafë Plloçë–Qukës është ndërprerë përkohësisht për shkak të rënies së inerteve dhe dherave në rrugë, duke krijuar rrezik serioz për sigurinë e mjeteve. Vendimi për mbylljen e segmentit është marrë për të shmangur aksidente, pas një ngjarjeje të regjistruar paraditen e sotme.
Policia Rrugore e Korçës dhe ajo e Elbasanit ndodhen në terren dhe po devijojnë mjetet drejt rrugës së vjetër. Patrulla policie janë vendosur në hyrje të Qafë Plloçës dhe në hyrje të Qukësit, për të ndaluar qarkullimin në aksin e ri.
Sipas autoriteteve, rruga do të mbetet e mbyllur deri në pastrimin e plotë të dherave dhe inerteve nga firma kontraktore, e cila ndodhet aktualisht në terren dhe po kryen ndërhyrjet e nevojshme. Ende nuk ka një afat të saktë se kur do të normalizohet qarkullimi në këtë segment.
Autoritetet u bëjnë thirrje drejtuesve të mjeteve të tregojnë kujdes, të ndjekin udhëzimet e policisë dhe të përdorin rrugët alternative deri në përmirësimin e situatës.