Gjatë fjalës së saj në Asamblenë Parlamentare të Këshillit të Europës (APKE), kryetarja e delegacionit shqiptar, Blerina Gjylameti, theksoi se zgjedhjet e 11 majit përbëjnë një arritje të rëndësishme demokratike për Shqipërinë. Ajo vuri në dukje se 95% e qendrave të votimit u vlerësuan pozitivisht nga vëzhguesit ndërkombëtarë, duke dëshmuar për një administrim profesional dhe një klimë të qetë gjatë procesit.
Gjylameti e konsideroi përfshirjen për herë të parë të diasporës shqiptare në zgjedhje si një hap historik, që forcon lidhjet mes shtetit dhe shqiptarëve jashtë vendit. Po ashtu, ajo vlerësoi rolin e SPAK, Prokurorisë së Përgjithshme dhe KQZ-së në hetimin dhe parandalimin e krimeve zgjedhore, duke ruajtur integritetin e procesit.
Duke njohur disa vërejtje të ngritura në raportin e monitorimit, Gjylameti u shpreh e angazhuar për thellimin e reformës zgjedhore, depolitizimin e institucioneve, rregullimin e financimit të fushatave dhe forcimin e lirisë së medias, në përputhje me rekomandimet e Komisionit të Venecias dhe ODIHR-it.
“Mbështetja e shqiptarëve për një mandat të katërt të Partisë Socialiste është më shumë sesa fitore politike – është një thirrje për përgjegjësi më të lartë ndaj demokracisë, transparencës dhe sundimit të ligjit,” përfundoi Gjylameti.
Fjala e plotë e Gjylametit
I nderuar President, të nderuar kolegë,
Më lejoni të nis duke falënderuar raportuesin z. Billi dhe znj. Martinez për raportin mbi zgjedhjet parlamentare në Shqipëri të mbajtura më 11 maj, i paraqitur sot këtu.
Si kryetare e Delegacionit Shqiptar në APKE, është një nder për mua të marr fjalën para kësaj Asambleje dhe të theksoj jo vetëm faktin që populli shqiptar, edhe një herë, i dha besimin e tij Partisë Socialiste, por sepse mbështetja e tyre e vazhdueshme ndaj socialistëve, tashmë për një mandat të katërt radhazi, është një shprehje e fuqishme e përkushtimit të Shqipërisë ndaj progresit dhe rrugës evropiane!
Por më shumë se një fitore politike, kjo është një thirrje për të qeverisur me më shumë përgjegjësi – në përputhje me vlerat që na bashkojnë këtu: demokracinë, transparencën, përfshirjen dhe sundimin e ligjit.
Jemi krenarë që këto zgjedhje u njohën si gjithëpërfshirëse, transparente, konkurruese dhe të administruara profesionalisht në një ambient të qetë dhe të drejtë.
Sipas vëzhguesve ndërkombëtarë, siç theksohet edhe në këtë raport, 95% e qendrave të votimit janë vlerësuar pozitivisht.
Kjo është një njohje për punën e palodhur të mijëra punonjësve të administratës zgjedhore dhe institucioneve në të gjithë vendin – dhe tregon se sa shumë ka ecur përpara demokracia jonë e re.
Jemi gjithashtu krenarë për përfshirjen historike të diasporës sonë, duke i mundësuar shqiptarëve që jetojnë jashtë të kontribuojnë për herë të parë në përcaktimin e së ardhmes së kombit tonë.
Dua të nënvizoj gjithashtu rolin thelbësor të SPAK-ut, Strukturës së Posaçme Kundër Korrupsionit, e cila në bashkëpunim me Prokurorinë e Përgjithshme dhe Komisionin Qendror të Zgjedhjeve, ka luajtur një rol kyç në parandalimin dhe hetimin e krimeve zgjedhore, për të ruajtur integritetin e procesit.
Puna e tyre është një dëshmi se sundimi i ligjit në Shqipëri nuk është vetëm një parim, por një realitet aktiv dhe në zhvillim.
Njëkohësisht, e pranojmë me përgjegjësi çdo shqetësim të ngritur në raport, të cilat do të punojmë me përkushtim për t’i adresuar sa më shpejt.
Në mënyrë të veçantë, mbetemi të angazhuar për të çuar përpara reformën zgjedhore, për të depolitizuar institucionet zgjedhore, dhe për të përmirësuar financimin e fushatës dhe lirinë e medias – në përputhje të plotë me rekomandimet e Komisionit të Venecias dhe ODIHR-it.
Të nderuar kolegë, vendosmëria e Shqipërisë për të vazhduar rrugën e reformave nuk lidhet vetëm me anëtarësimin – ajo lidhet me standardet dhe vlerat.
Lidhet me ndërtimin e një shoqërie ku qytetarët besojnë te vota e tyre, besojnë te institucionet, dhe ndihen të përfaqësuar në çdo nivel të qeverisjes.
Kjo na nxit të vazhdojmë punën tonë me përulësi dhe vendosmëri, jo vetëm për të përmbushur standardet, por për t’i jetësuar ato.