Atentati ndaj biznesmenit Bujar Nasufi në Tiranë, në derën e shtëpisë të tij, në sy të bashkëshortes, është drejt zbardhjes tha policia këtë të mërkurë.
Në një konferencë për shtyp Drejtori i Drejtorisë Vendore të Policisë Tiranë Drejtues Elton Alushi tha:
“Në lidhje me ngjarjen e rëndë kriminale të ndodhur ditët e fundit në Tiranë ku u vra me armë zjarri shtetasi Bujar Nasufi, Drejtoria Vendore e Policisë Tiranë është e angazhuar maksimalisht për zbardhjen sa më shpejt të kësaj ngjarje kriminale.
Nën drejtimin e Prokurorisë po punohet intensivisht, duke përdorur metodat speciale të hetimit dhe shfrytëzuar Inteligjencën policore në fuksion të zbardhjes dhe dokumentimit ligjor të kësaj ngjarje.
Gjithashtu janë mbledhur dhe administruar prova shkencore dhe kompjuterike që do ti sherbejnë hetimit për zbardhjen e ngjarjes.
Hetimet janë në dinamikë dhe komplekse dhe për këtë arsye nuk mund të bëjmë më dije të dhëna më shumë për këtë rast”, tha ai.
Ngjarja e rëndë ka ndodhur më 12 janar rreth orës 20:40, në vendin e quajtur “Pallati me Shigjeta” në rrugën “Myrte Zeneli” në Tiranë.
Nasufi së bashku me vëllanë ishte pronar i një mobilerie në zonën e “Pallatit me Shigjeta”, zonë ku iu bë dhe atentati.
Dyshohet se në momentin që është qëlluar, sapo ka dalë nga biznesi. Disa raportime thanë se ai u qëllua te dera e banesës, teksa policia tha se u qëllua ndaj mjetit të tij ku ndodhej me bashkëshorten. Dëshmitarët kanë parë mjetin e viktimës të ndaluar.
Autori dyshohet të ketë qenë i vetëm dhe ka qëlluar me pistoletë në xhamin ballor dhe anësor të makinës së viktimës.
Ndërkohë bazuar në informacionet paraprake të policisë, viktima nuk ka pasur kurrë probleme. Edhe fqinjët janë shprehur se ka qenë person i qetë dhe nuk kishte konflikte, as nuk ruhej dhe bënte një jetë normale./Radar.al