Sali Berisha fitoi lirinë pak ditë më parë, pasi gjykata vendosi të heqë masën e sigurisë shtrënguese të arrestit në shtëpi.
Ish-kryeministri rikthehet këtë të martë, 2 dhjetor në Kuvend pas 11 muajsh mungesë.
Rikthimi i tij përkon me marrjen pjesë në seancën ku do të votohet nen për nen projektbuxheti i vitit 2025.
Një seancë, që konsiderohet ndër më të rëndësishmet e aktivitetit parlamentar.
Buxhetin prej 8.2 mld eurosh Berisha e ka konsideruar si draftin e vjedhjeve të mëdha.
Tashmë në liri, Sali Berisha, teksa njoftoi edhe 2 amendamente në buxhet me firmën e tij, paralajmëroi rikthim të fuqishëm në Parlament.
“Ju jeni dëshmitarë se si dritarja zëvendësoi Parlamentin dhe Edi Rama në fjalimet e tij shprehte vrerin e papërmbajtur ndaj dritares. Kështu që unë kthehem nesër në Parlament, në vazhdim të betejës sime gjer në fitore. Kjo është!”, shprehet lideri demokrat.
Kuvendi nis sot në orën 10:00 seancën plenare, ku në rend të ditës është projektligji “Për buxhetin e vitit 2025”.
Me urdhër të Kryetares së Kuvendit, Elisa Spiropali, Kuvendi zhvillon sot seancën për miratimin nen për nen dhe në tërësi të buxhetit të vitit 2025.
Miratimi i buxhetit kërkon shumicë të thjeshtë votash, teksa sot do të shprehet Komisioni përgjegjës për Ekonominë dhe Financat.
Buxheti i vitit 2025, i diskutuar përgjatë 48 orëve në sallën e Kuvendit të Shqipërisë, u miratua më 19 nëntor në parim me 75 vota pro, 40 vota kundër, ndërsa 22 deputetë të pranishëm në sallë nuk morën pjesë në votim.
Buxheti i vitit 2025, është 2 herë më i lartë se ai i vitit 2013, me një total prej rreth 8,2 miliardë euro. Sipas parashikimeve, rritja ekonomike pritet të jetë 3,9%. Kjo rritje do të gjenerohet kryesisht nga kërkesa e brendshme, si nga konsumi privat ashtu edhe nga investimet totale në ekonomi. Turizmi po ashtu do të ketë një rol të rëndësishëm.
Radar.al