Kryetari i Partisë Demokratike, Sali Berisha, ka bërë një paralajmërim të fortë për kryetarin e Bashkisë së Lezhës, Pjerin Ndreu, gjatë një fjalimi në këtë qytet. Berisha i bëri thirrje qytetarëve dhe demokratëve të Lezhës të kundërshtojnë çdo formë të blerjes së votave dhe të mbështesin rikthimin e demokracisë. Ai deklaroi se Pjerin Ndreu dhe ata që përfshihen në këto praktika, si dhe ata që kërcënojnë qytetarët, do të shpallen terroristë dhe do të trajtohen sipas ligjeve të terrorizmit.
“Pjerin, do të shpallesh terrorist dhe do të trajtohesh me ligjet e terrorizmit, për çdo përpjekje për të kërcënuar qytetarët dhe për të manipuluar vullnetin e tyre”, tha Berisha.
Berisha theksoi se lufta kundër këtyre bandave të lidhura me pushtetin është një betejë për shëndetin e demokracisë dhe të ardhmen e vendit. Ai e akuzoi qeverinë e Edi Ramës për lidhje me oligarkët dhe trafikantët, duke e cilësuar “rritjen” ekonomike si një rritje të betonit dhe drogës. Berisha gjithashtu bëri thirrje për pjesëmarrje masive në zgjedhje, duke theksuar se fati i Shqipërisë do të vendoset më 11 maj, dhe se ky është një moment kyç për të ardhmen e vendit dhe të rinjve.