Deputetja e Partisë Demokratike, Jorida Tabaku, ka komentuar si një zhvillim të pakëndshëm lajmin për marrjen si të pandehur të ish-kryeministrit Sali Berisha në çështjen “Partizani”. Gjatë intervistës së saj në emisionin “Kjo Javë”, të drejtuar nga gazetarja Nisida Tufa në News24, Tabaku theksoi se ky zhvillim mund të ketë ndikim edhe brenda vetë Partisë Demokratike.
Ajo shprehu dëshirën që ky proces të përfundojë sa më shpejt, jo vetëm për të mirën e partisë, por edhe për faktin se Shqipëria ndodhet në një vit elektoral. Ndërsa foli për protestën e mbështetësve të PD-së jashtë SPAK në ditën kur Berisha u paraqit në Prokurori, Tabaku tha se një reagim i tillë nuk përbën ndonjë surprizë, duke qenë se protesta të ngjashme ndodhin gjithmonë kur Berisha është i pranishëm.
Tabaku theksoi se ka qenë gjithmonë në favor të bashkimit të PD-së dhe nuk ka patur kurrë dyshime se partia duhet të ishte e bashkuar.
Gjithashtu, ajo foli për rikthimin e saj në mbledhjet e Grupit Parlamentar, duke pranuar se e ka përjetuar me më pak emocione për shkak të zhvillimeve të viteve të fundit. “Bashkimi i PD është duke ndodhur, dhe ne duhet të vazhdojmë përpara me programin dhe angazhimin tonë elektoral”, përfundoi Tabaku.