Një stuhi e fuqishme ka goditur Serbinë pasditen e sotme, duke sjellë reshje intensive shiu, breshër dhe vetëtima në disa rajone të vendit, përfshirë edhe kryeqytetin Beograd. Për pasojë, shumë zona janë përmbytur.
Ministria e Punëve të Brendshme lëshoi një paralajmërim urgjent përmes një mesazhi SMS drejtuar banorëve të Beogradit, duke shpallur gjendje të jashtëzakonshme dhe duke i këshilluar ata të qëndrojnë brenda.
“Në fuqi është një paralajmërim për stuhi të fortë me reshje, breshër dhe erëra të forta, që mund të shkaktojnë përmbytje, rrëshqitje dheu, shembje dhe rrezik për sigurinë e njerëzve dhe kafshëve”, thuhej në njoftim.
Po ashtu, paralajmërohet për rrezik nga rrufetë, defekte në rrjetin elektrik dhe pengesa në komunikim dhe transport.
Qytetet si Obrenovaci, Pançeva, Mlladenovaci dhe Kragujevci janë mes zonave të prekura rëndë nga moti ekstrem. Deri tani nuk ka të dhëna për dëme të mëdha materiale, por autoritetet janë në gatishmëri për ndërhyrje të menjëhershme.