Bashkimi Evropian po përgatit atë që e cilëson si operacionin më të madh të historisë së tij për përballimin e zjarreve pyjore gjatë verës së vitit 2026, në një kohë kur Evropa po përballet me rritje të valëve të të nxehtit dhe thatësirave ekstreme.
Presidentja e Komisionit Evropian, Ursula von der Leyen, bëri të ditur se rreth 800 zjarrfikës nga 14 vende evropiane do të dislokohen në zonat më të rrezikuara të Qipro, Greqia, Italia, Franca, Spanja dhe Portugalia.
Sipas saj, operacioni përfaqëson një shembull të solidaritetit evropian, ku ekipe zjarrfikëse nga vende të ndryshme do të bashkohen për të mbrojtur jetën e qytetarëve, pronat dhe pyjet.
Në kuadër të planit, 22 avionë dhe 5 helikopterë të flotës evropiane do të jenë në gatishmëri për të mbështetur ndërhyrjet ajrore në rast zjarresh të mëdha.
Operacioni do të koordinohet dhe financohet nga Komisioni Evropian përmes Mekanizmit të Mbrojtjes Civile të BE-së, i mbështetur nga një qendër emergjence që funksionon 24 orë në ditë dhe ekipe ekspertësh për menaxhimin e krizave.
Po ashtu, BE planifikon krijimin e një stacioni të ri rajonal zjarrfikjeje në Qipro, me qëllim forcimin e reagimit të shpejtë ndaj zjarreve pyjore në Evropën Jugore dhe në rajonin e Mesdheut.
Sipas të dhënave të raportuara nga Organizata Botërore e Meteorologjisë dhe shërbimi Copernicus Climate Change Service, zjarret pyjore në Evropë dogjën mbi një milion hektarë gjatë vitit të kaluar, duke shënuar një nga nivelet më të larta të regjistruara ndonjëherë.