Bashkimi Europian ka tërhequr planet e debatueshme për monitorimin e detyrueshëm të komunikimeve online, të njohura si “chat control”.
Sipas diplomatëve të BE-së në Bruksel, nisma për të skanuar mesazhet në platformat si WhatsApp, Signal dhe shërbime të ngjashme nuk arriti të sigurojë shumicën e nevojshme të votave midis vendeve anëtare.
Në vend të kësaj, është propozuar një kompromis i ri, që parashikon pjesëmarrje vullnetare nga kompanitë e mesazheve, duke vazhduar me marrëveshjen ekzistuese.
Një zëdhënës i Ministrisë së Brendshme të Gjermanisë e quajti këtë zhvillim “shumë të mirëpritur”, ndërsa ministrja gjermane e Drejtësisë, Stefanie Hubig, tha se kompromisi “ofron mënyrën e duhur për të luftuar abuzimin ndaj fëmijëve pa cenuar të drejtat themelore të qytetarëve”.
Kritikët e planit fillestar kishin paralajmëruar se masa do të hapte rrugën për mbikëqyrje masive dhe cenim të privatësisë së qytetarëve europianë.
Debati për “chat control” ka nisur që në vitin 2022, kur Komisioni Europian paraqiti propozimin për skanimin automatik të mesazheve, imazheve dhe videove me qëllim identifikimin e materialeve të paligjshme që përfshijnë fëmijë.
Nëse do të miratohej, masa do të detyronte platformat të skanonin çdo mesazh dhe ta raportonin tek autoritetet hetimore – një ide që u kundërshtua fort nga ekspertët e sigurisë dhe organizatat për të drejtat digjitale.
Aktualisht, marrëveshja që lejon skanimin vullnetar është ende në fuqi dhe skadon në prill 2026, çka e mban temën të hapur për diskutime të mëtejshme.