Policia e Tiranës dhe Prokuroria kanë bastisur zyrat e kompanive postare Elite Post dhe Expres24 Post, në kuadër të një hetimi për evazion fiskal dhe shpërndarje mallrash pa dokumentacion të rregullt.
Burimet zyrtare bëjnë me dije se gjatë kontrolleve janë sekuestruar kompjuterë, dokumentacion dhe sasi parash prej 13 milionë lekësh, si dhe mallra të marra në dorëzim pa fatura tatimore.
Hetimi, i drejtuar nga prokurori Ndini Tavani dhe sektori i Krimit Ekonomik, ka nisur pas lejes së gjykatës për kontroll në disa subjekte që ofrojnë shërbime postare në kryeqytet.
Prokuroria njofton se procedimi penal është regjistruar me nr. 156, viti 2026, për veprën penale të evazionit fiskal, sipas nenit 180 të Kodit Penal. Hetimet vijojnë për të identifikuar shitësit realë dhe për të dokumentuar plotësisht aktivitetin e dyshuar të kundërligjshëm.