Kryeministri francez Sébastien Lecornu ka shkaktuar debat në Francë pasi vizitoi një furrë buke dhe bleu një bagetë më 1 maj, Ditën Ndërkombëtare të Punës, një veprim që ka nxitur reagime të forta nga sindikatat.
Ngjarja ndodhi në prani të mediave, por më pas u pasua nga kritika, pasi furra ishte e hapur në një ditë kur, sipas traditës sindikale dhe ligjit francez, shumica e punonjësve duhet të kenë pushim. Në Francë, më 1 maj lejohen të punojnë vetëm shërbimet thelbësore, si spitalet, ndërsa puna në këtë ditë paguhet me kompensim të dyfishtë.
Sindikatat e kanë kundërshtuar këtë praktikë dhe po ashtu çdo ndryshim ligjor që do të lejonte përjashtime për bizneset si furrat e bukës. Sekretarja e përgjithshme e sindikatës më të madhe në vend, Marylise Léon, e cilësoi gjestin e kryeministrit si “teatër politik”, duke theksuar se problemi i vërtetë lidhet me kushtet e punëtorëve.
Më herët, Lecornu kishte zhvilluar edhe një bisedë telefonike me një bukëpjekës të gjobitur për punë në 1 maj, i cili ishte penalizuar me 5,250 euro në total për shkeljen e rregullave.