Kreu i NATO-s, Mark Rutte, i referohet Donald Trump-it si “babi” në një koment që ka marrë dhenë në rrjet. Duke folur për ndërhyrjen e SHBA-së në krizën Iran-Izrael, Rutte tha: “Dhe pastaj babi ndonjëherë duhet të përdorë gjuhë të ashpër”, duke nënkuptuar rolin udhëheqës të Trump dhe mënyrën e tij të komunikimit.
I pyetur më pas për këtë deklaratë, Trump reagoi me stilin e tij të zakonshëm: “Ai më pëlqen. Mendoj se i pëlqej. E bëri shumë me dashuri. ‘Babi, ti je babai im’,” tha ai mes të qeshurave, duke thelluar më tej atmosferën e pazakontë të samitit.
Kur një gazetare britanike e pyeti nëse i konsideron aleatët e NATO-s si fëmijët e tij, Trump nuk dha një përgjigje të prerë, por tha: “Ata kanë nevojë për pak ndihmë”, duke shtuar me krenari se “ajo që bëtë është e mahnitshme”, në lidhje me rritjen e shpenzimeve të vendeve anëtare për mbrojtje.
Në fund, ndërsa largohej nga foltorja, Trump nuk harroi të bëjë një koment karakteristik: “Mos harroni, SHBA-të janë vendi më i nxehtë në botë.”
Ky episod, mes ironisë, “lajkave” diplomatike dhe batutave presidenciale, është kthyer në një nga momentet më të komentuara të samitit në Hagë.