Kryegjyshi Botëror Haxhi Dede Edmond Brahimaj ka pritur në selinë e Kryegjyshatës Boterore Bektashiane, delegacionin e Shtetit të Holandës, të kryesuar nga znj. Bea-Sen Tussher, dërguar speciale e Ministrisë së Jashtme të vendeve të ulta për fetë dhe liritë fetare.
Baba Mondi njoftoi delegacionin me rolin historik që ka luajtur Bektashizmi në çështjen kombëtare. Ndër të tjera theksoi se vizioni që përçon Bektashizmi sot është një mesazh i madh për harmoni, tolerancë dhe bashkëjetesë fetare, si thesari i unitetit, sigurisë dhe paqes.
Ndërkohë ka thënë se Nisma e Kryeministrit të Shqipërisë, Edi Rama, për krijimin e shtetit sovran bektashi, është një vlerësim për rolin që ka luajtur Kryegjyshata Botërore si qendër e bektashinjve të botës në mbi 33 vende dhe për vizionin e bektashizmit për paqe dhe vëllazëri botërore, me të gjitha fetë dhe të gjithë popujt, për të ecur së bashku dhe për të jetuar si vëllezër.
Zonja Bea-Sen Tussher, pasi falënderoi Kryegjyshin për mikpritjen, theksoi se roli i bektashizmit është shumë i rëndësishëm për promovimin e vlerave të islamit të sotëm, të inkorporuar në shoqërinë e sotme europiane. Ajo vlerësoi gjithashtu se shteti Sovran Bektashi do të përçojë vlera të reja, të domosdoshme për shoqërinë e sotme njerëzore./Radar.al