Avokatët e kryebashkiakut të Tiranës, Erion Veliaj, i janë drejtuar zyrtarisht Drejtorisë së Përgjithshme të Burgjeve me një kërkesë për informacion dhe dokumentacion lidhur me shoqërimin e tij në një vizitë mjekësore më 17 korrik 2025.
Veliaj, i cili ndodhet në paraburgim në IEVP Durrës që prej 12 shkurtit, kishte kërkuar prej kohësh trajtim shëndetësor, por sipas mbrojtjes, vizita u autorizua vetëm pas disa refuzimesh. Avokatët pretendojnë se gjatë transportit dhe ekzaminimit janë marrë masa “të papërshtatshme dhe të pajustifikuara sigurie”, duke përfshirë rreth 30 efektivë policie dhe hetues të BKH-së, disa prej të cilëve ishin të pranishëm edhe brenda sallës së ekzaminimit – gjë që ata e cilësojnë si shkelje të protokolleve mjekësore dhe të trajtimit njerëzor.
Në kërkesën e paraqitur, mbrojtja kërkon detaje për procedurat e ndjekura, forcat e angazhuara, kohëzgjatjen e qëndrimit në institucionin shëndetësor si dhe planin e masave të sigurisë.
Zyra ligjore paralajmëron se çdo shkelje ndaj dinjitetit dhe trajtimit njerëzor të klientit të tyre do të ndiqet me të gjitha mjetet ligjore.