Një aksident ajror tragjik është regjistruar në aeroportin ndërkombëtar La Romana International Airport në Santo Domingo, ku një avion privat është rrëzuar gjatë përpjekjes për ulje, duke shkaktuar vdekjen e dy anëtarëve të ekuipazhit.
Sipas raportimeve, bëhet fjalë për një avion të tipit Gulfstream, i cili po tentonte të ulej kur humbi kontrollin në pistë. Pamjet e publikuara tregojnë momentin kur avioni prek pistën, rrëshqet dhe më pas shpërthen në flakë, duke u shndërruar në një top të madh zjarri.
Pas përplasjes, tym i dendur është ngritur mbi aeroport, ndërsa ekipet zjarrfikëse kanë ndërhyrë menjëherë për të shuar flakët dhe për të izoluar zonën e incidentit. Autoritetet konfirmuan se piloti dhe bashkëpiloti humbën jetën në vendngjarje.
Avioni ishte planifikuar të kryente një fluturim çarter drejt Austin, Texas në SHBA, ku do të merrte ish-yllin e bejsbollit Yadier Molina dhe familjen e tij. Lajmi ka shkaktuar reagim të gjerë në komunitetin sportiv, ndërsa Molina ka shprehur trishtimin e tij përmes një postimi në rrjete sociale.
Autoritetet e aviacionit kanë nisur hetimet për të përcaktuar shkaqet e sakta të aksidentit, ndërsa pista është mbyllur përkohësisht pas incidentit.