Autoriteti i Konkurrencës ka nisur një hetim paraprak në tregun e transportit urban në zonën e Kamzës, pas ankesave të qytetarëve për rritjen e çmimeve të biletave dhe aboneve. Hetimi i drejtohet shoqërisë SHPRESA-AL SHPK, e cila operon linjat Kamzë–Tiranë–Kamzë dhe Paskuqan–Babrru–Tiranë.
Sipas verifikimeve fillestare, kjo shoqëri rezulton të jetë operatori i vetëm i licencuar në këto linja, duke mbajtur një pozitë dominuese në treg. Autoriteti i Konkurrencës thekson se, në këtë fazë paraprake, nuk janë konstatuar analiza të plota ekonomike dhe financiare që të justifikojnë rritjen e tarifave të aplikuara për shërbimin e transportit urban.
Hetimi do të përfshijë periudhën nga 1 janari 2025 deri më 12 dhjetor 2025 dhe do të synojë të përcaktojë nëse janë shkelur dispozitat e ligjit “Për mbrojtjen e konkurrencës”.