Hetimet për atentatin me armë ndaj kandidatit të BDI-së, Zekirija Shaini, i cili mbeti i plagosur me disa plumba, kanë marrë një kthesë të papritur.
Sipas mediave vendase, në pranga ka rënë bashkëshortja e tij, e dyshuar për përfshirje në tentativën për vrasjen e tij.
Ministria e Brendshme e Maqedonisë së Veriut njofton se është shpallur në kërkim edhe i dyshuari për gjuajtjen, një 36-vjeçar nga Gostivari.
Deklarata e Ministrisë:
“Më 07.10.2025, punonjës policie nga Stacioni Policor i Kumanovës arrestuan A.A., 43 vjeç, nga Tetova, për dyshimin e përfshirjes në tentativën për vrasjen e bashkëshortit të saj, Z. Sh., 43 vjeç, nga fshati Sllupçan, Likovë. Gjashtë persona janë thirrur për intervistim, ndërsa në shtëpinë e B.S., 50 vjeç, nga Kumanova, është kryer bastisje me urdhër gjyqësor. Kundër A.A. do të parashtrohet kallëzim penal, ndërsa kundër L.F., 36 vjeç, nga Gostivari, i cili dyshohet për tentativë vrasjeje dhe gjendet ende në arrati, do të paraqitet kallëzim penal pas konsultimit me Prokurorinë Themelore.”
Ngjarja ka tronditur opinionin publik dhe ka hapur pyetje mbi motivet e këtij atentati brenda rrethit familjar. Hetimet vazhdojnë intensivisht.