Britania e Madhe ka vendosur sanksione ndaj tetë individëve dhe tre organizatave ruse për përfshirjen e tyre në deportimin me forcë të fëmijëve ukrainas që nga fillimi i luftës në 2022. Mes tyre është edhe Aymani Kadyrova, nëna e liderit çeçen pro-Kremlinit Ramzan Kadyrov dhe presidente e fondacionit “Akhmat Kadyrov”, i akuzuar për organizimin e programeve të riedukimit të fëmijëve ukrainas.
Sipas raporteve, rreth 20 mijë fëmijë ukrainas janë deportuar drejt Rusisë dhe territoreve të pushtuara, prej të cilëve rreth 6 000 janë futur në kampet e riedukimit, pjesë e përpjekjeve për të zhdukur identitetin kulturor ukrainas dhe për t’i përgatitur për shërbim ushtarak.
Organizatat e sanksionuara përfshijnë edhe “Volunteers of Victory” dhe “Movement of the First”, një grup rinor i ngjashëm me “Pionierët e Rinj Sovjetikë”. Të tjerë të sanksionuar janë zyrtarë të Ministrisë së Arsimit të Rusisë dhe komandantë ushtarakë çeçenë dhe të Tatarstanit.
Sekretari i Jashtëm britanik, David Lammy, e quajti veprimin e deportimit dhe riedukimit “të papranueshëm”: “Asnjë fëmijë nuk duhet të përdoret si peng i luftës. Po mbajmë përgjegjës ata që janë përfshirë në këto krime.”