Deputeti socialist Erion Braçe ka akuzuar publikisht kryetaren në detyrë të Bashkisë së Tiranës, Anuela Ristani, për neglizhencë dhe arrogancë në menaxhimin e një problematike mjedisore në zonën e Selitës.
Në një video të postuar në rrjetet sociale, Braçe publikoi një mesazh të marrë nga Ristani, ku kjo e fundit i sugjeronte t’i drejtohej një tjetër nënkryetari të Bashkisë për shqetësimin e ngritur.
“Që në shkurt i kam raportuar për një emergjencë mjedisore – koshat e mbeturinave të vendosur në mes të lagjes, pranë qendrës shëndetësore, postës dhe kopshtit. Javë pas jave ia kam përsëritur. Dje aty ishte lënë edhe një qen i ngordhur. Dhe çfarë merr si përgjigje? Ironi dhe arrogancë,” – deklaroi Braçe.
Ai shtoi se shqetësimi nuk lidhet me një çështje personale, por me problematikën e banorëve të zonës, duke theksuar se “këta janë njerëzit për të cilët Ristani dhe të tjerë kërkojnë vota”.
Braçe përfundoi duke nënvizuar se zyrtarët vendorë nuk mund të sillen me përbuzje ndaj qytetarëve dhe të injorojnë problematika që prekin drejtpërdrejt jetën e tyre të përditshme.