Një 30-vjeçar shqiptar është arrestuar më 17 shkurt në Aeroporti i Ciampinos, i dyshuar për rreth 80 vjedhje banesash të kryera në provincën e Ravenës gjatë viteve 2021–2024.
Sipas autoriteteve italiane, vjedhjet ndodhnin kryesisht gjatë orëve të natës dhe kishin si objektiv para në dorë si dhe sende me vlerë. Zonat më të prekura nga këto episode ishin Fiume Montone Abbandonato, Via Maggiore, Via Ravegnana dhe Via Poggi.
Nga hetimet rezulton se i dyshuari përdorte një metodë të thjeshtë për të hyrë në banesa: hapte hekurat e dritareve me anë të një kriku makine, mjet që është gjetur shpesh në vendngjarje. Analiza e periudhave kohore ka treguar se vjedhjet përqendroheshin në intervale të caktuara dhe ndërpriteshin kur 30-vjeçari nuk ndodhej në Itali.
Arrestimi u krye nga policia pas mbërritjes së tij me një fluturim nga Shqipëria. Pas ndalimit, ai u dërgua në paraburgimin Regina Coeli, ku do të qëndrojë në pritje të vijimit të procedurave ligjore.