Një biznesmeni shqiptar me vendbanim në Itali ka rënë në pranga nga policia vendase në Rimini.
Gjatë kontrollit fizik të banesës së tij u gjetën rreth 8 kilogramë kokainë.
Media e vendit fqinj raporton se lënda narkotike u gjet e fshehur në frigorifer, poshtë paletave dhe pas pllakave të kuzhinës.
I arrestuari është një 44-vjeçar shqiptar, sipërmarrës në sektorin e pasurive të paluajtshme, banues në zonën e Sant’Aquilina, por emri i tij nuk u publikua nga autoritetet policore.
Gjithashtu mes dollapëve, sirtarëve dhe rafteve në zona të ndryshme të shtëpisë, u gjetën edhe 80 mijë euro cash, që dyshohet se janë të ardhura të aktivitetit kriminal.
Gjatë kontrolleve nëpër vende të ndryshme të shtëpisë policia gjeti edhe disa kuti monedhash të rralla, koleksioniste dhe përkujtimore, si dhe ora luksoze (një Cartier, një Rolex dhe një Hamilton, autenticiteti i të cilave është aktualisht në verifikim).
Sipas hetuesve, dyshohet se sipërmarrësi shqiptar i ka blerë me paratë që rrjedhin nga shitja e kokainës, me qëllim pastrimin e parave të pista. Gjithashtu u sekuestruan edhe 35 fishekë.
Pas përfundimit të kontrollit, i autorizuar nga Prokuroria e Riminit, 44-vjeçari u arrestua dhe u dërgua në burgun Casetti.