TIRANË-Ditën e sotme Ilirjan Celibashi, kreu i komisionit Qendror të zgjedhjeve është përgjigjur disa pyetjeve sqaruese të emigrantëve për votën e Diasporës më 11 Maj dhe procedurën që duhet të ndjekin me ngarkimin e fotove në PER.
Përmes postimit në rrjetin social Facebook ditën e sotme Celibashi dha edhe disa këshilla e orientime.
“Kujdes, lexoni me shumë vëmendje dhe shpërndajeni postimin për të njohurit tuaj. Vetëm kështu mund të shmangen shumë gabime në aplikim.”-shprehet kreu i KQZ, duke nënvizuar më tej që të aplikohet dhe riaplikohet deri më 4 mars, kur mbyllet ky afat.
Pyetjes së cili është dokumenti i adresës që duhej ngarkuar në PER, ai i është përgjigjur: Një nga dokumentet; fatura e energjisë, fatura e telefonit, kontrata e qirasë, ose dokument tjetër të ngjashëm. Kujdes, gjatë ngarkimit të jenë të dukshme emri dhe adresa!
-Pyetjes nëse në dokument është emri i një familjari në adresë dhe jo i personit që do të regjistrohet, shpjegohet:
“Në këtë rast ju duhet të ngarkoni dokumentin me adresën, edhe pse nuk është në emrin tuaj dhe bashkë me të ngarkoni certifikatën familjare”.
-Pyetjes së dokumenti i adresës është në emër të personit me të cilin i interesuari banonte, përgjigja ishte:
“Nëse dokumenti i adresës është i një personi që nuk ka lidhje familjare me ju, por banoni me të, atëherë ngarkoni dokumentin e adresës, të shoqëruar me një deklaratë (edhe me shkrim dore), nga personi që zotëron dokumentin e adresës. Në këtë deklaratë duhet të përfshihet edhe një kopje e dokumentit të identifikimit të personit në emër të të cilit është dokumenti i adresës. Më pas të dy këto dokumente duhet të skanohen së bashku dhe të ngarkohen në PER” (të shpjeguara edhe në fotogaleri)./Radar.al