Gjykata e Lartë ka anuluar vendimin e Gjykatës së Elbasanit nga nëntori 2019, i cili u konfirmua më vonë nga Gjykata e Apelit në Durrës për Florenc Çapjan. Paneli gjyqësor, i përbërë nga Ilir Panda, Sokol Binaj dhe Sandër Simoni, shqyrtoi rekursin e prokurorisë që kundërshtonte pushimin e çështjes për tentativën e vrasjes së Fadil Memës, një ish-polic rrugor.
Më 20 nëntor 2019, gjyqtari Tomor Kullolli vendosi pushimin e çështjes ndaj Florenc Çapjan, duke e liruar atë nga qelia. Në atë kohë, gjykata deklaroi se nuk kishte prova të mjaftueshme për të implikuar Çapjan në këtë ngjarje. Vendimi u mor në seancën paraprake, ku gjykata vendosi nëse dosja do të kalonte për gjykim ose jo. Ky vendim u konfirmua edhe nga Gjykata e Apelit në Durrës, konkretisht nga gjyqtarja Anita Mici, më 14 prill 2020.
Si gjyqtari Tomor Kullolli ashtu edhe gjyqtarja Anita Mici u shkarkuan më pas nga Vettingu. Prokuroria kishte ngritur akuzat për “Vrasje me paramendim” e mbetur në tentativë dhe “Mbajtja pa leje e armëve luftarake” ndaj Çapjas. Prokuroria bëri rekurs në Gjykatën e Lartë, e cila vendosi të rikthejë çështjen për rigjykim në Gjykatën e Elbasanit në seancë paraprake.
Vendimi i Gjykatës së Lartë përfshinte: “Prishjen e vendimit nr. 3096 (13-2019-6955), datë 20.11.2019, të Gjykatës së Rrethit Gjyqësor, Elbasan, dhe vendimit nr. 10-2020-480 (76), datë 14.04.2020, të Gjykatës së Apelit, Durrës dhe dërgimin e çështjes për rigjykim në Gjykatën e Rrethit Gjyqësor, Elbasan – gjyqtari i seancës paraprake, pranë kësaj gjykate.”
Bëhet fjalë për një atentat ndaj Fadil Memës në vitin 2006.