Qendra Spitalore Universitare “Nënë Tereza” do të ketë një drejtim të ri. Pas rreth 14 muajsh në krye të institucionit më të madh shëndetësor në vend, largohet nga detyra Prof. Alma Cani. Në vend të saj, drejtimin do ta marrë pediatrja e njohur onkohematologe, Profesoreshë Donjeta Bali.
Burime bëjnë me dije se prezantimi zyrtar i drejtoreshës së re do të zhvillohet të enjten, në një takim me stafin drejtues të QSUT.
Prof. Donjeta Bali është një emër i njohur në fushën e mjekësisë pediatrike dhe pjesë e QSUT-së prej më shumë se dy dekadash. Ajo është specializuar në trajtimin e sëmundjeve të rënda të fëmijëve, veçanërisht në onkohematologji dhe patologji të rralla.
Alma Cani mori detyrën më 25 mars 2024, pas një karriere të gjatë në shërbimin e reanimacionit në Spitalin Universitar “Shefqet Ndroqi”.
Ky ndryshim në krye të QSUT vjen në një moment të rëndësishëm për sistemin shëndetësor shqiptar, me pritshmëri të larta për reformë dhe përmirësim të shërbimeve për qytetarët.