Pasi ditën e sotme mediat raportuan se Alibeaj është dorëhequr nga rekursi në Gjykatën e Lartë për logon dhe vulën e PD-së, ka ardhur menjëherë reagimi nga Demokratët Euroatlantikë.
Në një njoftim të shpërndarë në rrjet theksohet se ata nuk kanë hequr dorë nga shqyrtimi i rekursit në Gjykatën e Lartë.
“Çdo kërkesë e depozituar sot, nga individë që nuk janë pjesë e Partisë Demokratike/ Demokratët Euroatlantikë, ka zero efekt në këtë proces. Ata që kanë shpallur sot tërheqjen janë vetëdemaskuar, si autorët e një shantazhi politik për interesa të ngushta personale. Vetëm dy ditë më parë drejtues të Koalicionit Euroatlantik /PD – Demokratët Euroatlantikë, janë kërcënuar, se nëse Koalicioni Euroatlantik, nuk do t’ju nënshtrohej kushteve për bashkëpunim, duke hequr dorë nga identiteti ynë politik, do të përballeshin me tërheqjen nga rekursi në Gjykatën e Lartë”, thuhet në reagim.
Ndërsaq më tej shtohet se beteja do të vazhdojë dhe nuk ka shantazh që i bën që të tërhiqen.
“Demokratët Euroatlantikë e kanë provuar me vepra, se nuk ka forcë të na shantazhojë dhe se nuk biem pre e asnjë presioni. Ne kemi qëndruar dhe qëndrojmë për parime dhe vlera. Duhet të marrë fund koha kur interesat politike i mbivendosen të drejtës në këtë vend. Ne do ta vazhdojmë pa u ndalur, betejën ligjore dhe i kërkojmë Gjykatës së Lartë të marrë një vendim sa më shpejt, bazuar në ligj, pa u ndikuar nga presioni, shantazhet apo lojërat politike që synojnë të marrin peng Partinë Demokratike për tu mbrojtur nga drejtësia”, përfundon reagimi.