SHBA
Autoritetet amerikane kanë shpallur gjendjen e jashtëzakonshme në Nju Jork dhe Nju Xhersi për shkak të reshjeve të dendura të shiut dhe përmbytjet e mëdha që kanë përfshirë dy shtetet. Situata duket apokaliptike, me autostrada, linja hekurudhore e ajrore të bllokuara.
Ekipet e shpëtimit punuan pa ndalim për të larguar ata që ishin bllokuar në rrugë. Në Nju Xhersi, më shumë se 14,000 qytetarë mbetën pa energji elektrike për më shumë se 24 orë. Autoritetet kanë paralajmëruar qytetarët që të qëndrojnë në shtëpi e të shmangin daljet e panevojshme pasi përmbytjet janë kudo, në rrugë, bodrume, sistemet e metrosë, madje deri në katet e larta të ndërtesave.
Vonesa të mëdha dhe anulime fluturimesh u raportuan në aeroportet e Nju Jorkut, Nju Xhersit, Uashingtonit dhe Filadelfisë. Stuhia erdhi vetëm dy javë pas reshjeve të mëdha që shkaktuan përmbytje në sistemin e metrosë së Nju Jorkut, duke lënë të vdekur dy persona në Nju Xhersi, ndërsa disa të tjerë janë shpallur të zhdukur.
Radar.al