Një zjarr i përmasave të mëdha ka përfshirë një depo tekstili në qytetin Tubize, në jugperëndim të Bruksel, duke detyruar autoritetet të evakuojnë banorët për shkak të rrezikut nga tymi toksik dhe mundësisë së shpërthimit të bombolave të gazit.
Kryetari i bashkisë, Samuel d’Orazio, deklaroi për radion lokale RTBF se situata paraqet rrezik serioz për zonën përreth, pasi në ndërtesën e përfshirë nga flakët ndodhen bombola gazi që mund të shpërthejnë në çdo moment.
Përmes një njoftimi zyrtar, autoritetet lokale u kanë kërkuar qytetarëve të qëndrojnë brenda banesave, me dyer dhe dritare të mbyllura, për të shmangur ekspozimin ndaj tymit toksik, i cili sipas raportimeve përmban edhe grimca asbesti.
Ndërkohë, bashkia ka hapur një palestër sportive për strehimin e banorëve të evakuuar, ndërsa Qendra e Krizave në Belgjikë ka zgjeruar zonën e alarmit edhe në pjesë të tjera në jug dhe perëndim të Brukselit për shkak të përhapjes së tymit.