Në Këln po zhvillohet evakuimi më i madh civil në Gjermani që nga përfundimi i Luftës së Dytë Botërore, pasi janë zbuluar tre bomba të pashpërthyera amerikane, të hedhura nga forcat aleate rreth 80 vjet më parë. Rreth 20,000 banorë janë urdhëruar të largohen nga shtëpitë dhe bizneset e tyre, ndërsa zona përreth është bllokuar plotësisht.
Bombat – dy prej tyre të peshës 20 tonë dhe një 10 tonëshe – u zbuluan gjatë punimeve ndërtimore pranë një kantieri anijesh në bregun e djathtë të lumit Rajn. Të pajisura me fitil impakti, ato përbëjnë rrezik serioz për shpërthim, ndaj autoritetet kanë mbyllur tre ura mbi lumin Rajn, kanë pezulluar trafikun hekurudhor dhe kanë evakuuar një spital, një qendër për të moshuarit, shkolla, kopshte, muze, si dhe ndërtesën e transmetuesit RTL.
Transmetimi i drejtpërdrejtë i lajmeve është zhvendosur në Berlin, ndërsa në qytetin e vjetër të Këlnit është pezulluar çdo aktivitet. Bombat pritet të çaktivizohen të mërkurën në mëngjes.
Kjo ngjarje nënvizon faktin se, edhe tetë dekada pas përfundimit të Luftës së Dytë Botërore, trashëgimia e saj vdekjeprurëse vijon të rrezikojë jetën dhe sigurinë në një nga qytetet më të bombarduara të Gjermanisë.