Më shumë se 35 shkolla dhe kopshte në Australi dhe Zelandën e Re janë mbyllur urgjentisht, pasi autoritetet kanë ngritur alarmin për praninë e asbestit në rërën e përdorur nga fëmijët.
Në rajonin e Canberrës, kryeqyteti australian, 15 shkolla dhe 7 kopshte u mbyllën plotësisht, ndërsa 6 institucione të tjera pezulluan aktivitetin pjesërisht si masë paraprake. Raportohet gjithashtu për një mbyllje në shtetin australian Queensland.
Në Zelandën e Re, Departamenti i Arsimit konfirmoi së paku 5 kopshte dhe 2 shkolla të mbyllura përkohësisht.
Alarmi u ndez pasi Komisioni Australian i Konkurrencës dhe Konsumatorit (ACCC) paralajmëroi të mërkurën për tërheqjen nga tregu të disa produkteve boje që rezultuan të përmbanin gjurmë të asbestit tremolit, një material tepër i rrezikshëm.
Edhe pse autoritetet australiane theksojnë se çlirimi i fibrave të asbestit nga rëra është “i pamundur” pa përpunim mekanik si thërrmimi apo pluhurëzimi, rreziku potencial ka detyruar institucionet të marrin masa të menjëhershme. Asbesti është i njohur prej dekadash si shkaktar i sëmundjeve të rënda të mushkërive dhe formave agresive të kancerit.
Në Zelandën e Re, Ministria e Biznesit, Inovacionit dhe Punësimit iu bëri thirrje qytetarëve të ndalojnë përdorimin e rërës së dyshuar dhe të kërkojnë asgjësim të sigurt nga profesionistë të licencuar.
Importi dhe eksporti i asbestit është i ndaluar në të dy vendet, por rëra e prekur — e importuar nga Kina — është shpërndarë gjerësisht në Australi gjatë viteve 2020–2025, kryesisht përmes dyqaneve të artikujve të ndryshëm, bojërave dhe mjeteve për fëmijë.