Një ndjekje spektakolare në rrugët e Tiranës përfundoi këtë të mërkurë me arrestimin e Skerdi Sinës, 29 vjeç, i njohur si shok i ngushtë i Aleksandër Sadikajt, i cili u vra me eksploziv në qershor të vitit 2022.
Ngjarja ndodhi rreth orës 16:30 në zonën e “Vasil Shantos”, kur forcat speciale “Shqiponja” sinjalizuan për ndalim një automjet tip “Audi Q8” me dy persona brenda, të dyshuar si të armatosur. Në vend që të ndalonte, drejtuesi i mjetit shtoi shpejtësinë dhe u përplas me tre automjete të tjera në tentativë për t’u larguar.
Pas një ndjekjeje me shpejtësi të lartë, automjeti u braktis në rrugën “Moskat”, ku të dy personat zbritën dhe u përpoqën të arratiseshin. Gjatë largimit, ata hodhën në tokë një armë zjarri që dyshohet se e mbanin me vete – një pistoletë që u sekuestrua nga policia për ekzaminime balistike.
Policia arriti të kapë njërin prej tyre, pasagjerin Skerdi Sina, të cilit gjatë kontrollit fizik iu gjetën një krehër dhe municion. Ndërkohë, identiteti i drejtuesit të automjetit tashmë është zbuluar dhe vijon puna për lokalizimin dhe arrestimin e tij.
Kush ishte Aleksandër Sadikaj?
Sadikaj u vra më 11 qershor 2022 në një atentat me eksploziv në aksin Tiranë–Elbasan. 27-vjeçari nga Berati kishte precedentë penalë për vjedhje, plagosje, vrasje dhe mosbindje ndaj policisë. Hetimet për vrasjen e tij vijojnë, me fokus tek konfliktet e së kaluarës.
Ngjarja e sotme vjen vetëm pak ditë pasi një tjetër shok i Sadikajt, E.M., 30 vjeç nga Bylyshi i Memaliajt, u denoncua i zhdukur pa gjurmë nga familjarët. Sipas kallëzimit të bërë më 24 qershor, ai është larguar nga banesa më 15 qershor dhe nuk është kthyer më. Policia e Gjirokastrës po vijon kërkimet për gjetjen e tij.