Një aksident me pasojë vdekjen e një fëmije është regjistruar në aksin rrugor Korçë–Ersekë, pranë fshatit Kamenicë.
Sipas informacioneve paraprake, fëmija ka qenë duke lëvizur i shoqëruar nga nëna e tij kur është përplasur nga një automjet. Për shkak të plagëve të marra, i mituri ka humbur jetën në vendngjarje.
Menjëherë pas ngjarjes, në zonë kanë mbërritur shërbimet e Policisë, të cilat kanë nisur veprimet hetimore për të zbardhur rrethanat dhe shkaqet e aksidentit.
Korçë/Informacion paraprak
Rreth orës 16:30, në aksin rrugor Korçë–Ersekë, në fshatin Kamenicë, automjeti tip “Nisan”, me drejtues shtetasin Sh. V., 76 vjeç, ka përplasur dy këmbësorë (nënë e bir), shtetasen Sh. M., rreth 44 vjeçe, dhe djalin e saj të mitur, rreth 3 vjeç.
Si pasojë e aksidentit, në spital ka ndërruar jetë fëmija i mitur, ndërsa shtetasja Sh. M, po merr ndihmë mjekësore, jashtë rrezikut për jetën.
Specialistët e Sektorit të Qarkullimit Rrugor shoqëruan në Komisariat drejtuesin e automjetit, shtetasin Sh. V., për kryerjen e veprimeve procedurale.
Grupi hetimor ndodhet në vendngjarje dhe po punon për zbardhjen e rrethanave të aksidentit.