Një aksident rrugor është regjistruar pas mesnate, në hyrje të Ksamilit, ku një motor ka dalë nga rruga duke lënë të plagosur tre persona. Ngjarja ndodhi rreth orës 01:10, pranë një karburanti.
Sipas të dhënave të para, drejtuesi i motorrit, shtetasi turk Deyvi Varon, humbi kontrollin e mjetit dhe përfundoi në trotuar, ku u përplas me një këmbësor italian. Nga përplasja mbetën të lënduar vetë drejtuesi i motorrit, pasagjeri i tij turk, si dhe këmbësori italian. Njëri prej të plagosurve dyshohet se ka pësuar frakturë në këmbë.
Të tre të lënduarit u transportuan menjëherë drejt Spitalit të Sarandës, ku ndodhen jashtë rrezikut për jetën.
Nga testet e kryera, rezultoi se drejtuesi i motorit ishte nën efektin e alkoolit, me një nivel prej 1.48 dhe 1.30 mg/l.
Policia Kufitare dhe ajo Rrugore kanë nisur hetimet për zbardhjen e plotë të rrethanave të aksidentit.