Sekretari britanik i Mbrojtjes, John Healey, ka urdhëruar një hetim për të verifikuar nëse pedofili i ndjerë Jeffrey Epstein ka trafikuar gra në Mbretëria e Bashkuar duke përdorur bazat e Forcave Ajrore Mbretërore (RAF).
Ish-kryeministri Gordon Brown ka kërkuar gjithashtu një hetim policor për të sqaruar nëse vëllai i Mbretit Charles III, Prince Andrew, ka përdorur fonde publike dhe aeroporte britanike për të takuar abuzuesin e dënuar seksual. Javën e kaluar, Duka i Jorkut u ndalua për pak kohë nën dyshimin për keqpërdorim të detyrës publike, në kuadër të hetimeve të reja mbi lidhjet e tij me Epstein.
Sipas raportimit të The Telegraph, Healey u ka kërkuar zyrtarëve të mos lënë asnjë dokument pa verifikuar, duke kontrolluar dosjet disa dekadëshe të Ministrisë së Mbrojtjes për të gjetur çdo lidhje të mundshme me avionin privat të Epstein.
“Ne do të ndjekim pa mëshirë çdo informacion që mund të hedhë dritë mbi këtë skandal”, citohet të ketë thënë një burim i ministrisë për gazetën.
Megjithëse regjistrat e fluturimeve të RAF-it fshihen pas tre muajsh, besohet se komunikimet mes zyrtarëve dhe kompanive private të udhëtimit mund të zbulojnë më shumë mbi lëvizjet e Epstein.
Sipas dokumenteve të publikuara nga Departamenti i Drejtësisë i SHBA-së muajin e kaluar, avioni i Epstein kishte ateruar më parë në dy baza ushtarake britanike: RAF Northolt dhe RAF Marham.
Në një nga dosjet, pretendohet se Princi Andrew kishte lehtësuar përdorimin e bazës RAF Marham. Sipas regjistrave të fluturimit për një avion të lidhur me financierin, atij iu lejua të ulej në Marham në vitin 2000, ndërsa Epstein dhe pasagjerët udhëtonin për të vizituar Sandringham Estate, rezidenca private e familjes mbretërore, rreth 20 milje larg bazës.
Në regjistrin e fluturimit përmendet edhe një pasagjere e identifikuar vetëm si “1 femër”, përshkrim që sipas raportimeve përdorej nga Epstein për të treguar një person të trafikuar për qëllime seksuale.