Mbrëmja gala e organizuar nga Federata e Basketbollit shënoi një moment të veçantë për njohjen e kontributeve më të spikatura në këtë sport.
Një prej vlerësimeve më të rëndësishme të mbrëmjes ishte çmimi i “Mirënjohjes” i akorduar Presidentit të Klubit Besëlidhja, z. Ylli Ujka, për angazhimin dhe mbështetjen e tij të palodhur ndaj basketbollit lezhjan. Çmimi u dorëzua nga Presidenti i Federatës, z. Avni Ponari, duke theksuar rëndësinë e këtij kontributi në zhvillimin e sportit.
“Shumë faleminderit Federatës Shqiptare të Basketbollit për vlerësimin dhe çmimin e ‘Mirënjohjes’ që më dhatë për angazhimin dhe mbështetjen ndaj Klubit Besëlidhja. Ky është një moment që më bën krenar dhe më motivon për të vijuar punën dhe përkushtimin ndaj basketbollit lezhjan. Kjo mirënjohje i dedikohet gjithë ekipit, tifozëve dhe komunitetit që na mbështesin në çdo hap. Së bashku jemi më të fortë!”, deklaroi z. Ylli Ujka.
Në të njëjtin event, Julian Hamati u nderua me çmimin si lojtari më i spikatur i vitit 2024, duke treguar performancën dhe lidershipin e tij të jashtëzakonshëm. Ndërkohë, Eldi Hysa u shpall lojtari më i pëlqyer nga publiku përmes një ankete online, duke reflektuar ndikimin e tij te tifozët dhe komuniteti i basketbollit.
Këto çmime janë dëshmi e përkushtimit, punës së palodhur dhe pasionit që individë si Ylli Ujka, Julian Hamati dhe Eldi Hysa japin për basketbollin shqiptar, duke e çuar këtë sport drejt sukseseve të reja.