Ditën e sotme Partia e Lirisë zhvilloi një protestë para ambjenteve të SPAK, për burgosjen e presidentit të tyre, Ilir Meta.
Qytetarët u mblodhën para godinës me disa pankarta ku shënohej “Ndal burgimeve politike”.
Teksa protesta po zhvillohej, Ilir Meta reagoi nga burgu. Nëpërmjet një letre presidenti i PL bëntë thirrje që tubimi të vazhdonte sepse sipas tij, ishte Dumani ai që e firmosi rrëmbimin e tij.
Nga ana tjetër, sekretari i PL-së Tedi Blushi, teksa mbajti fjalim, ngriti akuza ndaj SPAK si shkatërruesi i reformës në drejtësi dhe që po mbron korrupsionin.
Ai akuzoi Dumanin si mercenar më të verbër të rilindjes, që sipas tij ka mision persekutimin politik të opozitës.
“Është ky Altin Dumani që shkul një fshat të tërë për ta hetuar për një autokombajnë pa leje. Është një institucion mashtrues e montues procesesh të rreme me zero fakte e dokumente dhe zero prova ndaj liderëve të opozitës vetëm për llogari të narkomafies. Dumani është armiku i shtetit të së drejtës, lirive, dinitetit njerëzor të çdo shqiptari. Është mercenari më i verbër i rilindjes, misioni i të cilit është persekutimi politik i opozitës”.
Prezentë në protest ishin Erisa Xhixho, Tedi Blushi, Petrit Vasili, Lefter Maliqi, Genc Gjokutaj dhe Petraq Milo. Por munguan Edmond Haxhinasto, Edmond Panariti dhe Agim Nesho.
Po ashtu as Monika Kryemadhi paralajmëroi se nuk I bashkohej protestës ndaj ish-bashkëshortit të saj.
Kësaj proteste nuk iu bashkua aleati Sali Berisha e zyrtarë të lartë të PD por gjithashtu munguan edhe disa eksponentë të vetë PL-së.
Kreu i Partisë Demokratike, Sali Berisha, tha sot gjatë një konference për shtyp se ata ishin të ftuar të merrnin pjesë, por kjo protestë nuk ishte organizuar nga koalicioni.
Berisha tha se PD së bashku me PL-në do ta dërgojë çështjen e arrestimit të tij në Komitetin Antitorturë të Këshillit të Evropës.
“Protestën e organizonte Partia e Lirisë. Demokratët kanë qenë të ftuar të marrin pjesë, por nuk ka qenë organizim i koalicionit kjo protestë. Përkundrazi, PD e konsideron rrëmbimin e Ilir Metës dhe keqtrajtimin e tij, zvarritjen dhe goditjen, si një nga aktet më të rënda të torturës publike të regjistruara nga vitet ’50 gjer sot.
Dhe PD, së bashku me PL do e dërgojë këtë rast përpara Komitetit Antitorturë të Këshillit të Europës, në mënyrë që ata që e organizuan këtë akt, të marrin ndëshkim ndërkombëtar. Akt i verbër i hakmarrjes politike e Edi Ramës ndaj Ilir Metës”, tha Berisha.