Kreu i Partisë Demokratike – Demokratët Euroatlantikë, Lulzim Basha, ka reaguar pas deklaratës së ish-kryeministrit Sali Berisha, i cili mohoi kategorikisht mundësinë që Basha të jetë pjesë e listës së kandidatëve të PD-së për zgjedhjet parlamentare të 11 majit 2025.
Në një postim në Facebook, Basha e akuzoi Berishën për, siç thotë ai, “ndarje të qëllimshme të opozitës” dhe për t’u kthyer në një “asistencë për Edi Ramën”.
Akuzat e Bashës
Basha theksoi se ish-kryeministri ka vendosur interesat personale mbi kauzën opozitare dhe se veprimet e tij po i shërbejnë mbajtjes së pushtetit të Ramës.
“Berisha ka pranuar të jetë nën patronazhimin e Edi Ramës. I dha votat për amnistimin e të korruptuarve të tij, për mbylljen e listave dhe pazaret e radhës me Gjykatën Kushtetuese. Kjo është e turpshme dhe dëshmon që vula e përdorur prej tij nuk i shërben demokratëve, por problemeve të tij personale me drejtësinë,” deklaroi Basha.
Ai shtoi se Berisha nuk mund të funksionojë pa një “armik politik” dhe e akuzoi për hedhjen e “shashkave qesharake” për të shmangur debatin publik nga çështjet e rëndësishme që lidhen me aferat qeveritare.
Përjashtimi nga lista
Më herët, gjatë një konference për shtyp, Sali Berisha u shpreh prerazi se përfshirja e Bashës në listat e kandidatëve për deputetë është e pamundur.
“Jashtë çdo lloj mundësie, aq sa mund të jetë Taulant Balla,” tha Berisha, duke shtuar se Basha dhe deputeti socialist janë të “mpleksur” në çështje të shumta.
Kur u pyet nëse Basha do të hiqet nga Grupi Parlamentar i PD-së, Berisha e cilësoi atë si “vëlla siamez të Taulant Ballës”, duke nënkuptuar afërsinë e tij me qeverinë Rama.