Shqipëria do të rikthejë përfaqësinë e saj diplomatike në Republikën e Irlandës. Këshilli i Ministrave ka miratuar vendimin për hapjen e Ambasadës së Republikës së Shqipërisë në Dublin, duke rikthyer një përfaqësi diplomatike që kishte qenë e mbyllur prej vitesh.
Vendimi është marrë me propozim të Ministrisë për Evropën dhe Punët e Jashtme dhe synon forcimin e marrëdhënieve diplomatike, ekonomike dhe konsullore mes Shqipërisë dhe Irlandës.
Sipas vendimit të qeverisë, shpenzimet për hapjen dhe funksionimin e ambasadës do të mbulohen nga buxheti i vitit 2026, në kuadër të programit “Mbështetje diplomatike jashtë shtetit” dhe fondeve të parashikuara për Ministrinë për Evropën dhe Punët e Jashtme.
Ministria është ngarkuar me zbatimin e këtij vendimi, i cili do të hyjë në fuqi pas botimit në “Fletoren Zyrtare”.
Vendimi i Këshillit të Ministrave:
- Miratohet hapja e Ambasadës së Republikës së Shqipërisë në Dublin, Republika e Irlandës.
- Shpenzimet për hapjen e ambasadës do të përballohen nga buxheti i vitit 2026, në programin “Mbështetje diplomatike jashtë shtetit”, në zërin “Shpenzime korrente” të Ministrisë për Evropën dhe Punët e Jashtme.
- Ministria për Evropën dhe Punët e Jashtme ngarkohet me zbatimin e vendimit.
- Vendimi hyn në fuqi pas botimit në “Fletoren Zyrtare”.