Një video e publikuar në rrjetet sociale, ku një e re shfaqej duke drejtuar automjetin me shpejtësi tej normave të lejuara, ka çuar në ndërhyrjen e Policisë së Fierit dhe ndëshkimin e saj.
Sipas Drejtorisë Vendore të Policisë Fier, drejtuesja e automjetit u identifikua dhe u shoqërua në Komisariatin e Policisë Divjakë, së bashku me mjetin që drejtonte.
Pas verifikimeve, ndaj saj u vendos një gjobë prej 80 mijë lekësh të rinj, për shkeljet e konstatuara të Kodit Rrugor.
Gjithashtu, policia i pezulloi lejen e drejtimit për 12 muaj, pasi rezultoi se ajo drejtonte një automjet me fuqi motorike më të lartë nga sa lejon kategoria e patentës që disponon.
Policia Rrugore apeloi edhe një herë për respektimin e rregullave të qarkullimit dhe u bëri thirrje qytetarëve të denoncojnë në numrin 112 çdo shkelje, duke garantuar reagim të menjëhershëm dhe zbatim të ligjit.