Një deklaratë e gazetarit argjentinas Eduardo Feinmann ka ndezur debat në prag të përballjes së Botërorit mes Meksikës dhe Anglisë. Gjatë një interviste për Radio Mitre, ai pretendoi se disa futbollistë të Ekuadorit ishin kërcënuar nga një kartel meksikan përpara sfidës së 1/16 së finales, të fituar nga Meksika me rezultatin 2-0.
Sipas Feinmann, pesë lojtarë ekuadorianë dhe familjarët e tyre dyshohet se u vunë nën presion për të ndikuar në rezultatin e ndeshjes.
“Çështja e Botërorit është mjaft e ndërlikuar. Duket se tashmë është konfirmuar se ka pasur kërcënime nga një kartel meksikan ndaj futbollistëve të Ekuadorit. Ata kontaktuan pesë lojtarë, duke u dhënë detaje specifike për familjarët e tyre në Ekuador dhe Meksikë. Është tronditëse”, deklaroi gazetari.
Ai shtoi se lojtarët ishin kërcënuar që të humbnin ndeshjen ndaj Meksikës, duke pretenduar se grupet kriminale synonin ta shihnin kombëtaren meksikane të shpallej kampione e botës.
Megjithatë, këto pretendime nuk janë konfirmuar nga autoritetet zyrtare. Sipas portalit meksikan De10.mx, deri më tani as FIFA dhe as Federata Ekuadoriane e Futbollit nuk kanë dalë me një deklaratë që të vërtetojë ekzistencën e këtyre kërcënimeve.
Para ndeshjes, Federata Ekuadoriane kishte shprehur shqetësim vetëm për zhurmat, serenatat dhe përdorimin e mjeteve piroteknike pranë hotelit ku ishte akomoduar kombëtarja, por pa ngritur akuza për kërcënime ndaj futbollistëve.
Meksika mposhti Ekuadorin 2-0 më 1 korrik dhe në fazën e 1/8 së finales do të përballet me Anglinë në stadiumin Azteca, në ndeshjen e planifikuar për 6 korrik.