Kur nisni një lidhje, zakonisht nuk mendoni në mënyrë të arsyeshme për të ardhmen, por më shumë udhëhiqeni nga emocionet dhe ndjenjat e momentit. Dashuria fillon si një periudhë emocionale e fortë, ku kimia dhe entuziazmi mbizotërojnë gjithçka tjetër. Por me kalimin e kohës, ajo që ka më shumë rëndësi nuk është vetëm ndjenja, por stabiliteti dhe aftësia për të ndërtuar një të ardhme së bashku.
Në jetën reale, ajo që e bën një marrëdhënie të zgjasë nuk është vetëm pasioni, por përputhshmëria dhe mënyra si dy persona funksionojnë si ekip. Prandaj, përveç ndjenjave, ka disa tregues të qartë që tregojnë nëse partneri juaj është i duhur për një lidhje afatgjatë.
- Ndani të njëjtat qëllime dhe vlera në jetë
Një partner që ka vlera dhe synime të ngjashme me tuajat është po aq i rëndësishëm sa dikush i suksesshëm apo tërheqës, shpesh edhe më shumë. Arsyeja është e thjeshtë: përputhshmëria e thellë krijon siguri emocionale, diçka që vetëm kimia nuk mund ta garantojë.
Ngjashmëritë sipërfaqësore (hobi, muzikë, shije në filma etj.) mund të ndihmojnë, por nuk janë vendimtare. Ajo që përcakton vërtet jetëgjatësinë e një lidhjeje janë vendimet kryesore të jetës:
dëshira për fëmijë dhe familje
menaxhimi i financave
besimet fetare ose vlerat personale
prioritetet e karrierës
vendi ku dëshironi të jetoni në të ardhmen
Kur dy persona janë të përputhur në këto pika, kompromisi bëhet më i lehtë dhe vendimet merren si ekip. Por kur qëllimet janë të kundërta, lindin konflikte të vazhdueshme që shpesh nuk kanë zgjidhje të lehtë.
Studime psikologjike tregojnë se ngjashmëria në personalitet dhe vlera lidhet me kënaqësi më të madhe në marrëdhënie, veçanërisht kur partnerët ndajnë tipare si stabilitet emocional, përgjegjshmëri dhe empati.
Në thelb, një marrëdhënie e shëndetshme është ajo ku të dy partnerët kanë një drejtim të përbashkët në jetë, edhe nëse nuk janë identikë.
- Pranon përpjekjet për pajtim pas konflikteve
Pavarësisht sa të përputhur janë dy persona, konfliktet janë të pashmangshme. Ajo që bën diferencën është mënyra si ata sillen pasi tensioni fillon.
Një nga shenjat më të rëndësishme të një marrëdhënieje të qëndrueshme është aftësia për të pranuar “përpjekjet për pajtim, momentet kur njëri partner përpiqet të ulë tensionin dhe të rikthejë komunikimin normal.
Këto mund të jenë gjeste të thjeshta si:
“Më fal, ta shpjegoj ndryshe.”
“Po e marrim shumë seriozisht, të bëjmë një pauzë.”
një gjest i butë ose kontakt fizik për qetësim
një shaka për të ulur tensionin
“E kuptoj pse je i/e mërzitur.”
Studimet në psikologjinë e marrëdhënieve tregojnë se këto përpjekje janë thelbësore për të rikthyer ekuilibrin emocional pas një konflikti. Më efektivet janë shpesh ato emocionale si: empatia, humori dhe mirëkuptimi.
Kur këto përpjekje pranohen, konflikti kthehet në zgjidhje. Por kur refuzohen vazhdimisht, marrëdhënia fillon të mbushet me tension, distancë dhe ftohtësi emocionale.
Në një marrëdhënie të shëndetshme, jo vetëm që partnerët dinë të debatojnë, por dinë edhe si të rikthehen tek njëri-tjetri pas debatit.