Në qytetin Erfurt të Gjermanisë janë regjistruar përplasje mes policisë dhe protestuesve që kundërshtojnë partinë e ekstremit të djathtë “Alternative für Deutschland” (AfD), gjatë zhvillimit të konferencës së saj kombëtare.
Mijëra efektivë policie u vendosën në qytet, ndërsa rreth 20,000 protestues dolën në rrugë duke bllokuar akse kryesore dhe duke tentuar të pengojnë delegatët e AfD-së të arrijnë në vendin e konferencës.
Protestuesit, të organizuar nga aleanca “Resistance”, vendosën bllokada në qendër të qytetit, ndërsa disa prej tyre u ngjitën në ura autostrade dhe mbi shinat e tramvajit për të krijuar pengesa. Policia ndërhyri në disa raste me shkopinj gome për të shpërndarë turmat.
Autoritetet policore thanë se protesta ishte “kryesisht paqësore”, megjithëse u raportuan rreth 100 shkelje, përfshirë dëmtime pronësie dhe grafite.
Pavarësisht përpjekjeve për bllokim, AfD njoftoi se rreth 540 delegatë arritën në kohë në qendrën e konferencës dhe punimet nisën sipas planit.
Zgjedhja e datës së konferencës ka shkaktuar reagime në Gjermani, pasi përkon me një datë historike të lidhur me konferenca të partisë naziste në Weimar, ku Adolf Hitler prezantoi simbolet e regjimit nazist.
Historianë dhe politikanë e kanë quajtur këtë një provokim të qëllimshëm, ndërsa AfD e ka mohuar, duke akuzuar kritikët për “instrumentalizim të historisë”.
Në protestë morën pjesë edhe disa politikanë gjermanë, përfshirë ministrin e Mjedisit Carsten Schneider dhe ministrin e Brendshëm të landit Turingia, Georg Maier, të cilët u bashkuan me marshimet kundër ekstremit të djathtë.
Protestuesit deklaruan se synimi i tyre ishte të dërgonin një mesazh kundër zhvendosjes politike drejt së djathtës ekstreme, ndërsa disa prej tyre kërkuan edhe ndalimin e AfD-së si parti.