Një armë e Luftës së Dytë Botërore është nxjerrë nga lumi Neisse në Gjermani nga Shërbimi i Çmontimit të Municioneve Eksplozive (KMBD), gjatë punimeve në një pjesë të lumit pranë qytetit Forst në rajonin e Lusacisë.
Sipas autoriteteve, bëhet fjalë për një top këmbësorie sovjetik 76 mm, modeli M1943, i përdorur nga Ushtria e Kuqe gjatë Luftës së Dytë Botërore. Arma ishte e ndryshkur, por në gjendje relativisht të mirë, pasi kishte qëndruar për dekada e mbuluar nga balta dhe rëra e lumit.
“Pikërisht kjo e ka ruajtur. Nuk mbaj mend një gjetje të ngjashme në këtë rajon,” u shpreh eksperti i KMBD-së, Enrico Schnick.
Qyteti i Forstit në Lusacinë e Poshtme ishte pothuajse i shkatërruar plotësisht gjatë luftimeve të ashpra mes Wehrmacht-it gjerman dhe Ushtrisë së Kuqe në prill të vitit 1945. Sot, qyteti ka rreth 17,000 banorë.
Sipas autoriteteve, arma nuk do të ekspozohet në muze, por do të dërgohet për çmontim dhe asgjësim të sigurt.
Gjetje të tilla të armëve të Luftës së Dytë Botërore nuk janë të rralla në Europë, ndërsa raste të ngjashme kanë shkaktuar më parë edhe evakuime dhe ndërprerje të transportit në qytete të ndryshme.