Shqipëria dhe Maqedonia e Veriut po hedhin një tjetër hap drejt modernizimit të procedurave kufitare, përmes hartimit të një protokolli të ri për zbatimin e Marrëveshjes Ndërqeveritare mbi kontrollet e përbashkëta kufitare.
Dokumenti i ri synon të rrisë efikasitetin e kontrolleve doganore, të lehtësojë tregtinë dhe lëvizjen e udhëtarëve, si edhe të përmirësojë menaxhimin e kufirit në përputhje me standardet e Bashkimit Europian dhe objektivat e integrimit rajonal.
Për të diskutuar zbatimin e marrëveshjes dhe finalizimin e protokollit, delegacionet e dy administratave doganore, të drejtuara nga drejtori i Përgjithshëm i Doganës Shqiptare, Besmir Beja, dhe drejtori i Administratës Doganore të Maqedonisë së Veriut, Boban Nikolovski, zhvilluan një vizitë në pikën e përbashkët kufitare Qafë Thanë–Qafasan. Në takime morën pjesë edhe përfaqësues të misioneve të OSBE-së në të dy vendet.
Drejtori i Doganës Shqiptare, Besmir Beja, tha se bashkëpunimi mes dy institucioneve është një model i partneritetit që sjell përfitime konkrete për qytetarët dhe bizneset.
Sipas tij, protokolli i ri do të harmonizojë procedurat doganore, do të përmirësojë koordinimin në përdorimin e burimeve dhe do të forcojë kontrollet kufitare, duke lehtësuar njëkohësisht tregtinë e ligjshme dhe qarkullimin e udhëtarëve.
Edhe drejtori i Administratës Doganore të Maqedonisë së Veriut, Boban Nikolovski, vlerësoi bashkëpunimin mes dy vendeve, duke theksuar se marrëveshja do të ndikojë në uljen e kohës së pritjes në kufi, përshpejtimin e flukseve tregtare dhe rritjen e besimit të komunitetit të biznesit.
Përfaqësuesit e OSBE-së e cilësuan nismën si një hap të rëndësishëm për forcimin e bashkëpunimit ndërkufitar dhe sigurisë rajonale, duke theksuar se protokolli ndërton mbi bashkëpunimin shumëvjeçar në fushën e menaxhimit të integruar të kufirit.
Me finalizimin e tij, protokolli pritet të modernizojë procedurat kufitare mes dy vendeve, të rrisë efikasitetin operacional dhe sigurinë, si edhe të lehtësojë tregtinë dhe lëvizjen ndërkufitare në funksion të zhvillimit ekonomik dhe integrimit europian të rajonit.